சுமிதாவும் குக்கியும்

 

சுமிதாவின் குக்கி

ப.திருநாவுக்கரசு

****************

தொலைக்காட்சிகள் நாய்கள்  தொல்லைதருவதாக கடிபடுவோரின் பதற்றத்தை காட்டி வருகின்றன நாமும் பதறுகிறோம்.

குக்கி தெருவின் சிறார்கள் ஆதரவுதேடி அலைந்துவந்த நாய்க்குட்டிக்கு வைத்த பெயர்.குக்கி வளர்ந்து காளையாகிவிட்டான். கொஞ்சநாளாக பரவி வரும் கடி செய்தி பரவலால் அது நிகழ்ந்தது 

ஊராட்சி வாகனத்தில் பிரியமான ஒரு பிரியமுள்ள நாய் குக்கி பிடிபட்டு தூக்கிப்போடப்படுவதைப் பார்த்து முதியவள் சுமிதா  கதறுகிறாள். குக்கி தன் கடைசி நிமிடம்போல் ஓர் ஏக்கப்பார்வையோடு மறைகிறான். சுமிதாவுக்கு நான்கு நாட்களாக அண்ணம் தண்ணி ஆகாரமில்லை. ஒரு தெருநாயின்மேல் அவள் எதுவும் அவ்வளவு பெரிசாக பற்றுவைக்கவில்லை. தன் தனிவாழ்க்கையில் குக்கிதான் அவள் காலைச்சுற்றியும் வாசற்படியில் முகம்வைத்தும் அவளையே ஏக்கத்தோடு பார்ப்பான். 

அந்த மூதாட்டியின் தனிமையின் காரணங்களை அவன் தெரிந்திருக்க வாய்ப்பில்லை. ஆனால் பிடிவாதமான துணையாக மாறிவிட்டான். 

அவளுக்குக் காய்ச்சல். அதனால் ஏதும் சாப்பிடவில்லை. அன்று அவன் வாயில்லா ஜீவன் என்று அவள்வைத்த சோற்றை முகரக்கூட இல்லை. சுமிதா தெளிந்தபின்  ஆர்வமுடன் அவளைப் பார்த்தான்.

குக்கியின் கடைசிப்பார்வைதான் சுமிதாவை கண்கசியவைக்கிறது. மேகவெடிப்பு நிலச்சரிவில் நிரந்தரமாக மூடப்பட்ட அவள் குடும்பத்தின்பின் குக்கிதான் கண்முன்னால் உலவிய ஜீவன்.

மண்மூடிய அந்தச் சொந்தங்களைத் தாண்டி கண்சிமிட்டாமல்  வண்டியில் ஏற்றப்பட்ட குக்கியின் அந்தப்பார்வை சுமிதாவை வதைக்கிறது.

கடிகளை முன்னிட்டு அவைகளைப் பிடித்துஒரே குழியில் போட்டு மூடச்சொல்லும் முன் நிலச்சரிவில் பறிபோன சொந்தங்களை நினைக்காமல் எப்படி இருக்கமுடியும்? 

அவள் காய்ச்சல் தெளியும்வரை வயிறை காயவிட்டு வருந்தாத குக்கி அவளைப் பிரிவதால் பெரும்வலியோடு வண்டியில் போகிறான். 

பிடிக்கும் ஊழியர்களைவிடுங்கள் உங்களுக்கு என்ன ஆனது? நீதிமன்றத்தில் முறையிடுகிறீர்கள். உங்கள் முறையீட்டில் குக்கியையும் எழுதுங்கள். 

குக்கி ஒரு தனி உயிரல்ல. குழந்தைகள், இளையர்கள், முதியோர், மாற்றுத்திறனாளிகள் ஆதரவற்றர்களின் அருகில் தோழமையுடன் எண்ணற்ற குக்கிககள்! 

வெடிகுண்டுகளைத்தேட உதவும் குக்கிகள் யாருக்காக தேடுகின்றன?

தோழமை, நன்றி, காவல்களை குக்கியிடம் பார்த்தபின் ரேபியசையே சொல்லிச் சொல்லி விடைதேடுகிறீர்கள்!